澳職周五獨腳戲上演下游大戰，西部聯主場迎戰紐卡素噴射機。西部聯敬陪末席，當然希望藉主場之利搶分，紐卡素噴射機接連對勁旅表現不落下風，仲頻頻有波入，佢哋作客照攻，近5場作客4次開4球或以上，3.5球入球大要捧。
（無綫myTV SUPER周五下午4時45分直播）
包尾嘅西部聯15戰只得8分，今季要殺入季後賽機會微乎其微，不過話晒喺主場作賽，又唔會咁快舉手投降，佢哋近仗都可以取得入球，巴西射手丹尼爾彭夏及澳洲本土前鋒諾亞保迪，相信可以喺紐卡素噴射機身上搵到食。問題係西部聯後防穿窿，15場聯賽竟然無1場可以保持不失，亦係佢哋未能取得好成績嘅主因。
客軍近期入得又失得
紐卡素噴射機表現雖好轉，但略嫌欠運，上場作客西悉尼流浪者補時被對方追和3比3，之前鬥榜首嘅威靈頓鳳凰，又係比賽末段失波輸1比2，今場對包尾嘅西部聯，應該會把握機會早啲入多幾球，期望可以盡快鎖定勝局。噴射機射手史譚迪路普路斯已經射入13球，同科拿路利並列射手榜榜首，今場有機會再添食，佢哋作客唔會龜縮，近5場作客4次開4球或以上，入球大玩得過。
