今晚英超獨腳戲，韋斯咸主場鬥阿士東維拉。「錘仔幫」有進攻靈魂盧卡斯柏基達復出，火力提升；維拉為保前4不容有失，作客照攻，2.5球入球大有計。（Now 621及Viu TV 96台周日晚10時直播）
早前陷於低潮嘅韋斯咸，近5場取得3勝1和1負成功反彈，關鍵人物屬盧卡斯柏基達，自從呢位巴西中場復出後，「錘仔幫」呢5場狂入14粒，其中4次開3球或以上，柏基達近兩場都有波入，配合同樣弗爆嘅查洛保雲及古達斯，火力全開。
維拉保前4冇得縮
維拉上場聯賽主場對住爭4勁敵熱刺，竟然慘吞4蛋，爭前4變得被動，餘下賽程不容再失。佢哋上周中歐協聯16強次回合，就算有射手奧尼屈堅斯初段傷出，仍然大炒阿積士4比0晉級，攻力未受影響。不過維拉防守唔算穩健，近8場聯賽作客有7次開3球或以上，當中只有兩次冇失波，今晚更有隊長約翰麥甘尼坐波監，加上主帥艾美利崇尚進攻，勢必同「錘仔幫」駁火，大盤抵玩。
